Dissabte comencèt a Perpinhan (Païses Catalans) lo “Visa pour l’Image”, lo festenal de fotojornalisme internacional mai important. Coma cada an, e dempuèi 24 ans, lo festenal constituís un rendètz-vos excepcional pels amoroses de la fotografia jornalistica e amassa de milièrs de vesitaires que partejan la meteissa passion o mestièr, lo fotojornalisme.
Ongan lo festenal fa un omenatge a Rémi Ochlik, un fotograf lorenc mòrt en Siria en febrièr. Prepausa un trentenat d’exposicions e las ja tradicionalas nuèches de projeccions, collòquis e taulas redondas.
En total, i a 27 exposicions gratuitas repartidas per divèrses endreches de Perpinhan, que podètz consultar aicí, e que se pòdon vesitar cada jorn, de 10h00 a 20h00, fins al 16 de setembre. Del 17 al 30 de setembre, las exposicions demoraràn dobèrtas amb prioritat pels grops escolars.
E tanben lo “Visa Off”
Dissabte comencèt tanplan lo Visa Off, lo festenal de fotojornalisme alternatiu que nasquèt mercés a l’iniciativa dels comerçants perpinhaneses amb lo sosten del festenal oficial. Aital, trobaretz d’exposicions dins de comèrcis de la vila ont se fa tanben d’actes coma de vernissatges e de projeccions publicas. Lo Visa Off se debanarà atanben pendent doas setmanas. Consultatz aicí la lista de las exposicions. Lo convidat d’onor de 2012 es lo fotograf tolosan Bruno Aveillan.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari